آذری شعرلری

[t.s.m.t]

غم دیاریندا اجل پئیکی،گذار ائتمز بنا

یوخ سانیب واریم مگر،کیم اعتبار ائتمز بنا؟

یار جؤر ائتمز بنا اغیار تعلیم ائتمه دن
بالله اغیار ائیله ین احسانی یار ائتمز بنا!

داغیدیر هر لحظه رخت عیشیمی آهیم یئلی
قانسی ناحق ظلم دور کیم،روزگار ائتمز بنا؟

عشق ذوقیله خوشام،ترکِ نصیحت قیل رفیق
بن کی تریاکی مزلجام،زهر کار ائتمز بنا!

چرخدن آشیرمادان یادینلا آه آتشین
غدر ائدیب گردون،شرردن زر نثار ائتمز بنا

نقد جان،تاراج غمدن ساخلاماق دشوار اولور
عشق تا سنگِ ملامتدن حصار ائتمز بنا

یادِ لعلینله فضولی گؤزله ییب راه عدم
وار بیر تدبیری،امّا آشکار ائتمز بنا

مولانا حکیم محمد فضولی بغدادی

[t.s.m.t]

ساقی!نه دوروبسان؟ائله بیر رقص حوبابی

وئر باده ی نابی

آزاد ائله بیر جام ایله بو مست و خرابی

پاک ائیله حسابی

یاران!نه قیلیم غم گونو بیر غیر علاجیم

یوخ باده دن ئوزگه!

بو قانی ایچیب یاد ائله رم غونچه تورابی

اول عطر گولابی!

اود توتدو تمامی بدنیم،یاندی سراسر

بو نار فراقه

من نئیله میشم کیم،چکیرم بونجا عذابی

بو جؤررو عیتابی؟

ساقی!حله بد مستلیک ائتمه بئله دمده

هرگیز دگیل اینصاف

ییخدین ائویمی،بیرده آت اول تیری شهابی

اول برگ لهابی

اول مطرب خوشخوان،ائله بیر رقص مخالیف

جانیم سنه قوربان

تؤک زولفونو،افشان ائله اول چتر قبابی

وئر کاکیله تابی

هر واخت دوشر یادیما اول نرگیزی مخمور

ای لاله عذاریم!

لبریز ائده رم قانیله بو چشم پر آبی

بومنزل خوابی

ای وادی وحدت ده قالان عاشیقی مهجور!

سرگشته و رنجور!

مئیخانه ده گئت رهن ائله قرآن و کیتابی

قالدیر بو حیجابی

قویما منی موشکول ده قالان زار و پریشان

ای مظهر باری!

گؤستر منه أوز نورون ایله راه صوابی

فتج ائیله بو بابی

مندن سورا بیللم کی قالیر باشینا داغلار

مجنون دورار آغلار

آخ یادیما سالدین یئنه ایّام شبابی

چک!چک!بو طنابی!

بو مولکی قاراداغدا بیر عاشیقی عوریان

همواره گئرکدیر

نه بنگی اولا،نه اولا یاقوت مذابی

نه جام شرابی

هر عاشیقی گؤردوم ائله دیم دردیمی ایظهار

احوالیما یاندی

بیر آه چئکیب،چالدی یئره چنگ و روبابی

وئردی بو جوابی:

((هر چند کی بیمار غم عشقه دوا یوخ

بیر سؤز دئییم امّا

یئیدیر بو مریضه یئنه به دانه لعابی

یا شربت آبی))

تفتیش ائده بیر کیمسه کی بو عاشق عوریان

ساکیندی نه یئرده

گل اوشتوبونا،تیغ ءوزومو،ناری،دوشابی!

آت قاپیا قابی

بسدیر،بو قدر آغلاما!بیچاره نباتی!

دلداردیان ئوترو

ذکر ائیله دمادم یئنه بو عرش جنابی

بیر خیضر نقابی

غم دفعینه،ساقی!منه بیر جام لبالب

قیل لوطف و عینایت!

خوناب یئدیرتمه منه،چک شیشه کبابی

وئر جتم شرابی

اول گوشه ی چشمینده اولان خال سیاهین

دوشمندی بو جانا

قویسان یئیه رم من بو دم اول نحس غورابی

چوخ چوخدو ثوابی

حکیم سید ابوالقاسم نباتی قاراجا داغی

[t.s.m.t]

بیلمیرم هئچ نه ایچون یار بنی تَرک ائتدی

أوره ییم ده قوشولوب یاریم ایله بیر گئتدی

عیشوه ایله منی هیندو ئوزونه قول ائله دی
روحومو دونیادا مین درد ایله مشغول ائله دی

بو بلانی منه آللاه ئوز گؤندردی فقط
ئوزو ده حیفظ ائیله یر،ائتسه،بلادان،البت

حمزه ئوز دؤلتینی وئردی تشککور آلدی
وار گئدندیر،اونا عالمده فقط آد قالدی

بیر بئله بخشیش ائدیر،فیکری اونون احساندیر
باشقا بیر مقصدی یوخ،چونکی تمیز اینساندیر

ئولکه ده قیتلیق اولارسا،او آچار بخشیش الی
وار یوخو گئتسه ده،آج قویماز،اینان کی،بو ائلی

اونون عزم ایله بلا لر هامیسی یوخ اولموش
بخشیشیله هامی او تهلوکدن قورتولموش

چؤهره سیندن یاییلیر هر یانا عیصمت نورو
هئچ نه ائتمز لکه لی بؤیله تمیز بؤللورو

سن باهارسان،یاغیشین عدل عدالت اولموش
کیمده بیلمم بئله بخشیش له کرامت اولموش؟

موسی شهوات

[t.s.m.t]

شامدا غریب مزارا تاپشیردیم بیر جاوانی

آللاه اونا یار اولسون،چاتدی ویدا زامانی

قبیرلردن أوزاقدا،تنها یئرده یاتدی او
وؤجودوندان بو دویماز تورپاقلارا قاتدی او

غملی غملی دایاندیم،مزارینا باش ایدیم
ماتمینده تک ئوزوم اینیمه قارا گیدیم

آغلادیم هؤنکور هؤنکور آیریلیرکن من اوندان
أوزاق أوزاق ائللرین غریب دوشموش اوغلوندان

بئله دیر اینسان عؤمرو،نئجه دوزون اولسادا
بیر گون ئولوم جاقلایار،سو ووشماز اوندان قادا

اسماعیل ابن یسار

[t.s.m.t]

دوست ایله دوشمن له دائم بیر گئدیر

دوستو خیلاص ائدیر،قیریر دوشمنی

***

صنعتیم گوجسوزه جسارت وئریر

ایتی قیلینج ائدیر ضعیف بدنی

***

دئیرلر شعرینی دوزلت،ضعیف دیر

ساتیلان سؤز پیس دیر،دینج بوراخ منی

***

تانری قلم وئریب اوجالدیر گؤیه

قلمله دوشمنی قیریب تؤکنی

***

قلم چوخ دوشمنین تؤکوب قانینی

تؤکوب ئوز قانینی،محو اولوب دنی

***

شعریم غریب غریب ئولکه لر گئزیر

روحو سئویندیریر شعیر سئونی

***

ابو نصر منصور ابن مومکان تبریزی

[t.s.m.t]

یورولار سیر ایسه اینسان،من ایسه دورماقدان

بیلکی،تنگه گئتیریب دیر بو عتالت جانیمی

***

هر کیمی گؤرموشم،ای وای،بو گون باغداد دا

نانجیب،ذاتی قیریق ظولمت ائدیب دؤرد یانیمی

***

ابو زکریّا یحیا ابن علی خطیب تبریزی

[t.s.m.t]

لیلة القدری تانری ئوزو سئچیب،بئینیب

هامان گئجه ایشلمیر شیطانین عملی

***

اگر بیلمک ایسته سن نئدیر بو لیلة القدر

گئرک کی،آچیق گؤزله سن آچاسان سحری

***

مسعود ابن نامدار

[t.s.m.t]

گؤزومون قاره سینه غمله دوشن آغ لکه سی

ئوتورم کیرپیئیم ایله،قورونام جاهیلدن

***

بو جهالت،بو موصیبت چئکه جک حشره قدر

ثروت اهلیله دیلنچیلر اگر اولماسا تن

***

اسکاف زنجانی

[t.s.m.t]

یالنیز یاخشی آد قالار بو وفاسیز دونیادا

هاما بونو درک ائدیب،آنلاییب بیلسین گئرک

***

گولر أوز ایله،آچیق ال خییره سبب اولار

بیزیم بؤیوک صاحیبین نجیب عمللری تک

خطّاط نظامی تبریزی

[t.s.m.t]

جماعت بوروندو خز پالتارلارا

آغاجلار أوستونه اسدیکجه خزان

***

هاوالار توتولدو،سولار دورولدو

دونیا هیددتلندی،قوجالدی جاوان

***

آلمایلا،هیوایلا،نارلا دولدو باغ

بوش قالدی لاله دن،گولدن گولوستان

***

ککلیک قاققیلدیسی داغدان کسیلدی

قیرقو وول صداسی گلمیر تارلادان

***

قطران تبریزی